मानवमात्रको कल्याण र उत्थानका लागि प्राचीन कालमा ब्राह्मण ऋषिमहर्षिहरूले गरेका योगदानहरूको स्मरण गर्दै त्यसैं दिशातिर लाग्न वर्तमान र भविष्यका ब्राह्मण समुदायलाई प्रेरित गर्ने।

नेपाली समाजमा फैलिन लागेको जातीय विद्वेष हटाउँदै सह-अस्तित्व, सद्भाव र सहिष्णुताको विकास गर्ने।

ब्राह्मण समुदायभित्र रहेका अनेक आन्तरिक विभेद र समस्याहरू सुल्फाउँदै सबैबीच पारस्परिक आत्मीय एकता कायम गर्ने।

व्यक्तिवादी र कर्मकाण्डमुखी हुँदै गएको ब्राह्मण जातीलाई समुदायमुखी र मानवतावादी बनाउँदै समाजसेवामूलक कार्यतर्फ अग्रसर गराउने।

गरिब, जेहेन्दार र पिछाडिएका बालबालिकाको शैक्षिक, आर्थिक र समाजिक उत्थानका लागि यथोचित कार्य गर्ने।

ब्राह्मण भन्ने कुरा मानिसको एउटा जातमा मात्र निर्भर नभएर मानिसभित्र हुने उच्चतर बुद्धि, विवेक र सत्योन्मुखी ज्ञानराशि पनि हो। त्यसको विकास गर्नका लागि व्यवहारमूलक ज्ञानयज्ञ, सत्सङ्ग, प्रशिक्षण, साधनाशिविरको व्यवस्था गर्दैं जाने।

हाम्रा पूर्वज ऋषिमहर्षिहरूले आर्जन गरेका ज्ञानराशि र आविष्कार गरेका वैज्ञानिक चिन्तन, संस्कृत भाषामा सुरक्षित भएकाले लोककल्याणका लागि उक्त भाषाको विकास, पठनपाठन र अध्ययन अनुसन्धानमा सहयोग गर्ने।

हाम्रो धार्मिक एवम् साँस्कृतिक कर्मसंस्कारलाई समयसापेक्ष एवम् व्यवहारिक बनाउँदै लैजाने र ती भित्रका जिवनोपयोगी वैज्ञानिक पक्षलाई उजागर गर्दैं जाने।

जातीय एकताका माध्यमबाट माथि उठ्दै अन्तरजातीय एकता र राष्ट्रिय एकता हुँदै सम्पूर्ण मानवीय एकतालाई आत्मसात गरी अन्त्यमा विश्व मानवतामा प्रतिष्ठित हुनु यस समाजको परम उद्देश्य हो।